Lapa
Monna ke hlogo ya lapa. Ka setlwaedi, go ba hlogo ya lapa ga go fe banna maatla a go tšea diphetho tše bohlokwa ka lapeng ka ntle ga go thušwa ke basadi ba bona. Basadi le bona ba kgatha karolo ye bohlokwa ge go tšewa diphetho tše bohlokwa ka lapeng. Mohlala, banna ba ka rera taba, ba tšea sephetho gomme ka morago ga moo ba ya go begela basadi ka sephetho se ba se fihlelletšego gore ba kgone go hwetša maele.
Le go basadi go no ba bjalo. Motse wa go hloka mosadi ka gare ga o be le hlompho goba sona seriti, ke ka fao ge monna wa kgope a bitšwago ka leina e sego ka sefane go swana le banna bao ba nyetšego. Mosadi ke mofepi wa mokgalabje wa gagwe le bana.
Karolo ya basadi ka lapeng ke goba mmago lapa. Selo se sengwe le se sengwe ka lapeng se feleletša go monna. Mosadi yena ke tšhwene o lewa mabogo, sa gagwe ke go apeela monna wa gagwe ka nako tša maleba, o ya temong, dikgonyeng le medirong ye mengwe ya basadi setšhabeng. Molao ka lapeng o swere ke monna. Ke ka fao go dumelwago gore mosadisadi ke yoo a theeletšago le go obamela melao ya monna wa gagwe. Ke yena a tšeago melao yeo a e ruta bana. Gantši ge ngwana a senya mmagwe o fela a re ke ile go botša tatago. Ka polelo e bjalo, o ra gore molao wa tatagwe o swanetše o latelwe.
Ngwetši e fa mmatswale dijo
Dinyakwa tša bana ka moka ba di begela mmago bona gomme yena a di iše go monna. Ka boripana, Basotho ba lebowa ba na le tumelo ya gore mosadi ke letsogo la monna ka lapeng.Lapa le na le diripa tše pedi. Seripa sa pele ke ka kgorong. Kgorong ke mo bašemane le banna ba etišago gona ge le phirimile. Dijo tša bona ba di jela kgorong gomme ka ntlong ba tsena ge ba e ya go iša marapo go beng. Kgorong ke moo bašemane ba ithutago melao ya bonna gore ka moso le bona ba be le boikarabelo bja go ka itebanya le merero ya metse ya bona. Basadi kgorong ga ba le bee ka ntle le ge gona le tiragalo ye e ba amago. Karolo ye nngwe ya lapa ke moo basadi le basetsana ba etišago gona ge ba phethile mešomo ya bona ya letšatši. Basetsana le bona ba rutwa melao ya bosadi ka kakaretšo gore le bona ba kgone goba bomme ba maikarabelo ge ba le malapeng a bona.
Nnete ke gore malapa a tiišwa ke go ba gona ga basadi. Ge monna a sa nyala le lapa la gagwe la le thupe, ga a hlomphiwe e bile a ka se bitšwe monna (batho ba tla fela ba botšiša gore ke monna wa mang?). Monna o mo bjalo o bitšwa ka leina e se bego sefane ka ge e se tatago motho mo lefaseng.
Mathomong
